Léif RaRo an Albatrossen, 

Wéi der (hoffentlech) vill vun Iech scho matkritt hunn, ass den 12 September zu Eschduerf eng méi lass. Den Eschduerfer Grupp feiert seng 25 Joer an huet dofir de Wisefestival an Liewe geruff. Niewent flotte Maartstänn, guddem Iessen a vill séierem Béier, ginn et natierlech och gutt Saache fir op d'Oueren. 

Wëllt Dir als Grupp een Deel vun eisem Festival sinn a souguer nach ee Präis gewannen? Da liest den Newsletter bis zum Schluss!

🏆 Wat gëtt et ze gewannen?

• 5 Entréeë fir de Wisefestival
• 2 Bongen am Wäert vun 20 €
• 2 × 1 Meter Béier / Cola-Wäin

🔍 Wéi funktionéiert d'Spill?

D'Juergd op de Willi Wiss ass amgaangen. 

Insgesamt sinn 3 Willi'en uechtert d'Land verstoppt ginn. De Willi hält sech immens gär bei Scoutschalet'en op. Wann äre Grupp e Willi fënnt, dierft dir e bei ärem Home oder Chalet verstoppen. Dee Grupp den de Willi den 12. September mat op de Wisefestival bréngt gewënnt de jeeweilege Präiss!

Awer opgepasst: De Willi däerf net einfach agespaart oder onméiglech ze fannen sinn. Aner Gruppen mussen eng fair Chance hunn, en nees ze entdecken an ze klauen. Sou kann de Willi bis de Festival, den 12. September, vu Grupp zu Grupp wanderen.

Fir d'Spill nach méi spannend ze maachen, sinn d'Willi'e mat engem AirTag equipéiert. Reegelméisseg verëffentleche mir d'Positioun vun den AirTags an eisem Newsletter an op eiser Website. Do fannt dir och ëmmer déi aktuell Informatiounen, bei wéi enger Grupp sech d'Willi'e grad befannen.

!Wann dir e Willi eruewert hutt, maacht eng Foto a schéckt se eis iwwer Instagram als Beweis!

📜 Reegelen

• De Willi dierf net modifizéiert, beschiedegt oder zerstéiert ginn.
• De Willi muss ëmmer accessibel sinn, also net op engem privaten Terrain
• Hie muss esou verstoppt ginn, datt aner Gruppen eng realistesch Chance hunn, en ze fannen.
• Et ass ausdrécklech erlaabt, e Willi vun enger anerer Grupp ze klauen.
• Dëst Spill ass just fir Scoutsgruppen, kuckt also dass de Willy net vun Friemen gekidnappt gëtt

Spillt fair a respektéiert de Scoutsgeescht.

Vill Spaass bei der Juegd a vill Gléck! 🔍🏕️

Fir all d'Scouten déi ee méi wäite Wee bis op Eschduerf hunn, an awer bis zum Schluss danze wëllen, déi kënnen op eisem exklusive Scoutscamping eng flott Nuecht verbréngen. 

Wann dir wëllt um Camping schlofen, da mëllt Iech weg. a follgendem Google Docs un. Maacht Iech bäi well d'Plazen si begrenzt.