|
Guiden- a Scoutsaktivitéiten
Zu Lëtzebuerg gëllen elo nei Reegelen am Zesummeliewe fir d’Pandemie vum Covid-19 an de Grëff ze kréien.
D’Guiden- a Scoutsaktivitéite mat de Jonke bleiwe weiderhin erlaabt a sinn och ausdrécklech erwënscht, fir de Kanner a Jugendlechen ze erméiglechen, an engem geschützte Kader weider aktiv ze sinn. Eis Aktivitéite kënnen hinnen dat bidden.
Trotzdeem musse mir eis den neie Restriktiounen upassen.
Vun elo u gëlle folgend Moossname bei Guiden- a Scoutsaktivitéiten:
- Maximal 30 Leit (Jonker a Chefs).
- D’Aktivitéite sinn all dobaussen.
- Jiddereen hält wärend der ganzer Aktivitéit eng Mask un.
- Iwwernuechtunge sinn net méi erlaabt.
- Et däerf just dann zesumme giess ginn, wa jidderee säin eegene Picknick matbréngt oder eng „Lunchtuut“ kritt. D’Iesse muss och dobausse stattfannen a jidderee muss dobäi eng Distanz vun op d’mannst 2 Meter zu deenen aneren anhalen.
D’Dokument mat den Detailer zu de spezifesche Coronavirus-Moossname bei den LGS gouf deementspriechend aktualiséiert, dir fannt déi nei (fënneft) Versioun op lgs.lu: COVID-19 Rotschléi V5.0
Mir wënsche jidderengem vun iech vill Courage. Als Guiden a Scouten maache mir eist Bescht fir eis Jonk duerch dës Zäit ze begleeden.
Aktiviéite vun Amicalen, Frënn, ASBLen, asw.
Am Pandemie-Gesetz besteet fir „parascolaire“ Aktivitéiten eng Ausnam zu den allgemenge Reegelen a Restriktiounen. Als „parascolaire“ Aktivitéiten ziele Guiden- a Scoutsaktivitéite wann dës fir a mat Kanner an/oder Jugendlecher organiséiert ginn, also Jonker (Biber, Wëllefcher, Avex, CaraPio, RaRo) an hier jeeweileg Chefs dobäi sinn, respektiv d’Virbereedung vun dësen Aktivitéiten: Versammlungen, Sortien, Weekender, Campen, Chefekippen/Maîtrisen a Grupperéit.
Aner Aktivitéiten, wou weder Kanner oder Jugendlecher, nach Chefs dobäi sinn, kënnen net als „parascolaire“ Aktivitéiten zielen a sinn dowéinst och net vun der Ausnam am Pandemie-Gesetz betraff.
An deem Sënn gëlle fir d’Aktivitéite vun Amicalen, Frënn, ASBLen asw. déi allgemeng Reegelen a Restriktiounen aus dem Pandemie-Gesetz.
- Maskeflicht an Distanz vu minimum 2 Meter wa méi wéi 4 Leit beienee sinn
- Fest Sëtzplaze mat enger Distanz vu minimum 2 Meter wa méi wéi 10 Leit beienee sinn.
- Rassemblementer vu méi wéi 100 Leit si verbueden.
- De Verkaf vun Iessen a Gedrénks si verbueden, ausser ënner Form vun Take-Out oder Livraisoun.
Fir de Verbandscomité,
Angélique Krier, Marc Weis an David Heck |
