Léif Cheftainen a Chef,

Den Educatiounsminister huet eis wärend enger Reunioun matgedeelt, dass d’Guiden- a Scoutsaktivitéite weiderhin ausdrécklech erwënscht sinn. Natierlech musse mir eis dobäi nach ëmmer un d’Recommandatioune vum Ministère a vun der Santé an d’Restriktiounen aus dem Pandemiegesetz halen. Et ass och kloer, dass d’Gruppe solle Summercampe plangen, och wann déi genee Konditiounen heifir bis elo nach net genee definéiert goufen. 

Fir d’Guiden a Scouten bedeit dëst also dass folgend Reegele gëllen (Neierunge beim Iessen !) :

• D‘Aktivitéite (Versammlungen a Sortien) fannen a Kontaktgruppe vu maximal 10 Leit (Kanner/Jugendlecher a Chefs) statt.
  
• Eng Kontaktgrupp muss wärend der ganzer Aktivitéit vun deene selwechte Chefs betreit ginn.
  
  
• E puer Kontaktgruppe kënnen zum selwechten Zäitpunkt eng Aktivitéit op deem selwechte Site hunn, ënnert der Konditioun dass se permanent Distanz zu eneen halen a sech net vermëschen.
  
  
• D’Aktivitéiten däerfen nëmmen dobausse stattfannen.
  
  
• Jiddereen huet wärend der ganzer Aktivitéit eng Mask un.
  
  
• Iwwernuechtunge si weiderhin net erlaabt.
  
  
• Et däerf wärend enger Aktivitéit giess ginn. Heibäi däerfe maximal 4 Leit beienee sëtzen, dës mussen an der selwechter Kontaktgrupp sinn an op d’mannst 2 Meter Ofstand zu deenen aneren „Iessgruppen“ halen. Wärend dem Iessen däerf d’Mask ausgedoe ginn. Mir recommandéiere weiderhin, dass jidderee seng eege „Lunchtuut“ matbréngt oder kritt. Och d’Iesse muss dobausse stattfannen.
  
  
• Mir hoffen, dass dir trotz dëse Restriktioune weiderhinn flott Aktivitéite kënnt organiséieren. Als Guiden a Scoute kënne mir de Jonken, déi bei eis kommen, et erméiglechen, an engem geschützte Kader aktiv ze sinn, fir dass si esou gutt ewéi méiglech duerch dës Zäit kommen.

Mir soen iech e grousse MERCI fir äert Engagement, är Flexibilitéit an äre super Asaz.

Marc WEIS an Angélique KRIER, TEAM

David HECK, LGS-Dokter