Wann’s de eppes kanns …

(oder ee kenns, deen eppes kann)

Dann dierfs du dat um Chefdag 2021 op den Däichwisen zu Ettelbréck gäre weisen an aner dovu begeeschteren. 

Vläicht bass du schonn éiweg dee beschte Gittar-Spiller, Break-Dancer, Schnitzmesserschnitzer, Jongleur, Geschichtenerzieler, … an dengem Grupp,

Vläicht hues du an der Corona-Zäit en neit Talent an Dir entdeckt,

Vläicht weess du besser wéi all déi aner Bescheed iwwer de Funktionnement vun enger Gasluucht oder iwwer Geologie ronderëm Ettelbréck, 

Vläicht häss du deen Dag Loscht op geocachen, awer du gleefs net, dass de Verband sou eng Aktivitéit wäert organiséieren,  

Vläicht hues du nach 10 Badger doheem leien, an dreems dovun déi zesumme mat aner Cheffen op d’Uniform opzebitzen (oder ze pechen) (bréng da w.e.g. en T-Shirt mat ),

Da bass du dee richtegen fir ee vu 40 verschidden Atelieren ze organiséieren, dëst mam Zil fir de Cheffen nei Iddien a vill Motivatioun mat op de Wee ze ginn.

De Chefdag 2021 leeft ënner dëser Form : 

• zu all voller Stonn fänkt en Atelier, Workshop, Tour, Gespréichsronn, Kompetitioun, … un, moderéiert oder begleet vu Cheffen an/oder Membere vum Verbandsgrupp ; 
• d’Unzuel vu Leit pro Atelier läit tëscht 10 an 20 (maximal awer souvill wéi dee Moment erlaabt) ; 
• et ass kee Stroum verfügbar ;
• den Atelier ass op der Däichwiss oder an der Ëmgéigend ;
• d’Participante kënne sech am Viraus aschreiwen (fir sech hir Plaz ze sécheren), mussen awer net (fir deen Dag flexibel ze bleiwen). Et ass also méiglech, dass Cheffen eppes kënne matbréngen, wat gebraucht géif ginn (z.B. e Schnëtzmesser) ;
•  en Atelier dauert ronn 45 Minutten ;
• all Atelier erfëllt den Usproch, dass d’Cheffen aktiv matmaachen. 

Soss Detailer an Ënnerstëtzung op programm_ekipp@lgs.lu