Bonne Action – Coronavirus

Als Guiden a Scouten limitéiere mir eis Hëllef op “ufälleg” Leit (héijen Alter, chronesch krank) déi eleng sinn a keng Famill oder aner Hëllef hunn. Mir ginn net bei Leit déi wéinst dem Covid-19 “isoléiert” sinn (d.h. mam Virus infizéiert a krank sinn) oder “auto-isoléiert” sinn (d.h. mat Symptomer ewéi beim Covid awer ouni Test) oder a “Quarantaine” sinn (d.h. a Kontakt mat engem Covid-Infizéierte waren).

Dat ass net onméiglech, mä: D’Leit, deenen dir hëlleft si jo ne krank, also ass dat Geld scho mol ok; wann dir beim Wiesselgeld, dat dir de Leit zréck gitt, wëllt ganz sécher goen, da kënnt dir hinnen et och an eng Këscht oder soss eppes leeën, no e puer Stonnen ass de Virus futti.

Wa Leit iech eng Ordonnance an de Grapp ginn, gi sinn iech jo kloer den Optrag fir hir Medikamenter an d’Apdikt sichen ze goen an et ass dann normal dass dir wësst wéi eng dat sinn. Wien dat net wëll, kann d’Ordonnance an eng Enveloppe maachen a froen dass den Apdikter d’Medikamenter an eng Tut mécht.

Eenzel Gruppe kruten d’Kopéiere vun hirem Flyer vun Dréckereie gesponsert, vläicht mol einfach iergendwou froen…

Dot d’Uniform ëmmer siichtbar un, soubal dir ënnerwee sidd fir am Kader vun der BA  Kommissioune fir aner Leit ze maachen. Gidd och ni zu méi wéi 3 op den Tour. Da gesinn d’Leit dass dir “an enger Missioun” ënnerwee sidd an net onnéideg (#bleiftdoheem).

De Coronavirus iwwerdréit sech iwwert Drëpsen, also beim Houschten oder Néitsen. Vu jonke Leit, déi keng Symptomer hunn, ass den Infektiounsgefor bei deene kuerze Kontakter un der Dier, fir d’Kommissiounen ze iwwerreechen, ganz geréng. Op jiddefalls vill méi niddreg wéi wann “ufälleg” Leit sech musse selwer an iwwerfëllte Supermarchéen deplacéieren.

Denkt drun dass eeler Leit wéineg an de soziale Medie present sinn an dofir är Proposen op Plaze wéi Facebook warscheinlech net gesinn. Dir kënnt z.B. Flyeren op “strategesche” Plazen ophänken (an de Supermarchéen, den Apdikten, bei den Dokteren, asw.) oder an de Bréifkëschte vun ärer Uertschaft / Quartier verdeelen.

Dës Aktioun leeft am beschten um lokale Plang. Dir musst lo net 50 Leit beliwweren, well anerer bidden och hir Hëllef un, op verschidde Plaze ginn z.B. och d’Gemengeverwaltungen an deem Sënn aktiv. Wann äre Grupp och nëmmen 2-3 Leit kann an dëser schwéierer Zäit hëllefen, dann hutt dir scho ganz vill geleescht.

Et hu sech eng Rei Leit gemellt fir ze hëllefen, déi keng Guiden a Scouten (méi) sinn. Mir hunn déi ëmmer opgefuerdert, sech bei engem lokale Grupp ze mellen. Wann dir dës Leit kennt, kënne si iech hëllefen. Passt awer op, dass si wierklech an eisem Sënn handelen. D’BA soll virun allem vu Guiden a Scouten ausgefouert ginn, op lokalem Plang, sou onkomplizéiert wéi méiglech. Aner Leit, kënne vläicht besser bei enger anerer Initiativ hëllefen, mëttlerweil ginn et där relativ vill.

Wie fir ufälleg Leit akafe geet, däerf elo net zousätzlech an e Spidol hëllefe goen, well do de Risiko grouss ass, dem Virus ze begéinen an dee mat de Kommissiounen ofzeliwweren.

Guiden a Scouten, déi net bei der BA engagéiert sinn, däerfen sech z.B. gär iwwer govjobs melle fir iergendwou ze hëllefen. Just oppassen, falls äre Grupp scho bei der BA matmécht kann et sinn dass iergendwann do Leit wech falen (z.B. well se krank sinn) an dir asprange musst. Dat geet awer net méi wann dir schonn op enger anerer Plaz wéi e Spidol hëlleft.